काठमाडौं । प्रहरी महानिरीक्षक (आइजिपी) सर्वेन्द्र खनालले संगठित सुन तस्करीका फरार अभियुक्तहरुलाई देशबाहिरबाट पनि पक्राउ गरेर ल्याउने काम भइरहेको बताएका छन् । प्रहरी महानिरीक्षकको रुपमा एक वर्षे कार्यसमिक्षा सुनाउने क्रममा खनालले संगठित सुन तस्करी रोक्ने काममा कुनै कसुर बाँकी नराखीएको बताएका हुन् ।
प्रहरी प्रधान कार्यालयले २०७५ सालभरीमा ७८ केजी ८ सय ७६ ग्राम अवैध सुन बरामद गरेको पनि जनाएको छ । अवैध सुनबाट मात्रै प्रहरीले ४५ करोड ४ लाख ६० हजार ६५ रुपैया राजश्व असुली भएको र अवैध सुन ओसारपसारमा १ सय ३७ जना पक्राउ परेको जनाएको छ ।
प्रहरीको कार्यसमिक्षा सुनाउने क्रममा प्रवक्ता एसपी उत्तम सुवेदीले संगठित सुन तस्करीमा संग्लन भरिया र दोस्रो तहका मान्छे समातिएको बताएका थिए । संगठित सुन तस्करीका पहिलो तहका मान्छे किन नसमातिएका भन्ने पत्रकारको प्रश्नमा प्रहरी महानिरीक्षक खनालले विदेशमा बसेर सुन तस्करीमा संग्लन रहेकालाई पनि पक्राउ गर्ने प्रयास भएको बताए ।
उनले गोरे भनिने चुणामणी उप्रेती संग्लन भएर ल्याइएको ३३ किलो सुनको विषयमा भने खुलेर बोलेनन् । प्रहरी महानिरीक्षकले सरकारी समितिले यसमा काम थालेको र आफूहरुले समितिलाई सघाएको बताएपनि तस्करीको सुन हराएको विषयमा थप बोलेनन् ।
यस्तै प्रहरी महानिरीक्षक खनालले अपराध नियन्त्रणमा सबै जनता सचेत हुनुपर्ने बताएका छन् । २०७५ सालमा प्रहरीबाट भएका कार्यसम्पादन तथा उपलब्धीबारे जानकारी दिँदै खनालले संगठनको नेतृत्व आफूले सम्हालेपछि हासिल गरेको उपलब्धी नै पारदर्शिता र व्यवसायिकता रहेको बताए ।
नेपाल प्रहरी पारदर्शी र व्यवसायिक भएको खनालको दाबी छ । ‘यहाँ नैतिक ह्रास भएको अवस्थामा प्रहरीले मात्र ठेगान लगाउँछु भन्ने कुरा कतिसम्म जान्छ । तर, लगाउनुपर्छ भन्ने मान्यतामा हामी छौं’, आइजिपी खनालले भने ।
समुदाय प्रहरी साझेदारी राष्ट्रव्यापी सञ्जाल र अपराध रोकथाममा प्रणालीगत सुधार, संगठित र पेशेवर आपराधिक गतिविधि नियन्त्रण, सशस्त्र एबं बिध्वंसात्मक गतिविधिमा प्रभावकारी प्रहरी कारबाही र नियन्त्रणजस्ता काम आफ्नो नेतृत्वमा यो वर्ष भएका उपलब्धी भएको खनालको भनाइ छ ।
‘शान्ति सुरक्षाको राम्रो अवस्था सिर्जना गर्न नेपाल प्रहरी कटिबद्ध छ । विकासको सन्दर्भमा आइपर्ने हरेक समस्या सटआउट गरेरै अघि बढ्छौं’, उनले भने ।
नेपाल प्रहरीप्रति रहेको नकारात्मक धारणालाई अन्त्य गरेरै छाड्ने खनालको दाबी छ । ‘नेपाल प्रहरीमा यस्तै थियो भनेर आउने नकारात्मक धारणालाई हामी न्यून होइन, जिरो बनाउन चाहन्छौं’, आइजिपी खनालले भने । मुलुकको शान्ति सुरक्षामा नेपाल प्रहरी, नेपाली सेना र सशस्त्र प्रहरीले खेलेको भूमिका आ–आफ्नो ठाउँमा महत्वपूर्ण भए पनि खनाल भने आफू र आफ्नो संगठन अघिल्लो पंक्तिमै रहेको दाबी गरे ।
निर्मला पन्त प्रकरण, ३३ किलो सुन काण्ड तथा रामबहादुर बम्जन प्रकरणबारे उनले अनुसन्धानको दायरा र जिम्मेवारीको विषय देखाएर बचाउ गर्दै सन्तोषजनक उत्तर दिएनन् ।
सुरक्षा क्षेत्रमा क्षेत्रीय तथा अन्तर्राष्ट्रिय सहयोग अभिवृद्धि, विशिष्टिकृत अनुसन्धान इकाईहरुको स्थापना, प्रभावकारी प्रहरी परिचालनद्वारा कानून र व्यवस्था कायम, नयाँ मुलुकी अपराध संहिताको वस्तुनिष्ठ कार्यान्वयन, सांगठनिक व्यवस्थापनमा सूचना प्रविधिको विकास, प्रभावकारी ट्राफिक व्यवस्थापन र विपद् उद्धार आर्थिक अनुशासन र आन्तरिक सुपरीवेक्षण प्रणालीमा प्रभावकारिता प्रहरी संगठनले यो वर्ष आफ्नो नेतृत्वमा गरेका मुख्य कामको रुपमा खनालले चित्रण गरेका छन् । महानिरीक्षक खनालले नेपाल प्रहरी पूर्ण रुपमा पारदर्शी हुन चाहेको बताए ।
