दार्चुला, ३१ वैशाख : भारतले नेपाली भूमी मिचेर सडक बनाएकाे क्षेत्रमा सशस्त्र प्रहरीकाे बिओपी स्थापना गरिएकाे छ । भारतले अतिक्रम गरि सडक बनाएकाे कालापानी क्षेत्रमा पहिलाेपटक सशस्त्र प्रहरीकाे बिओपी स्थापना गरिएकाे हाे । जनदबाब आएपछि सरकारले कालापनी क्षेत्रमा पहिलाेपटक सशस्त्र प्रहरीकाे बिओपी स्थापना गरेकाे हाे ।
सशस्त्र प्रहरी ५० नम्बर गुल्मका गुल्मपति डम्बरबहादुर बिष्ट प्रहरी टोली लिएर व्यास गाउँपालिका वडा नम्बर १ छाङ्रू पुगेका छन् । सातजना सशस्त्र प्रहरी र दुई जना स्थानीयका साथ नेपाली सेनाको एनए ०५७ नम्बरको हेलिकोप्टर लिएर गुल्मपति बिष्ट छाङ्रु पुगेका हुन्।
सशस्त्रको टोली बस्ने ठाउँ, घर र अन्य बन्दोबस्ती मिलाउन डिएसपीको टोली कालापानीबाट करिब १२ किलोमिटर दक्षिणपूर्वमा पर्ने छाङ्रु पुगेको हो । त्यहाँ पुगेर डिएसपी विष्ट नेतृत्वको टोलीले बोर्डर आउट पोस्ट पनि स्थापना गरेकाे छ । नेपाली सेनाको हेलिकोप्टरले ६ महिना पुग्ने खाद्यान्न, तारबार, इन्धन, सोलार र अन्य बन्दोबस्तीको सामान लिएर गएको हो।
सशस्त्र प्रहरी बलले छाङ्रुस्थित स्थानीयको घर भाडामा लिएर कार्यालय खोलेको छ । सशस्त्र प्रहरी बलसँगै नेपाल प्रहरीका नौजना समेत छाङ्रु गएका छन् । सितापुल चौकीका नौ जना हेलिकोप्टरबाट तीनजना त्यही चौकीका लागि व्यास गाउँपालिका वडा नम्बर २ दुम्लिङ प्रहरी चौकीबाट हिँडिसकेको प्रहरी नायव उपरीक्षक पदमबहादुर बिष्टले बताए ।
व्यासको छाङरुमा प्रहरी निरीक्षक लिलिबहादुर चन्दको नेतृत्वमा २५ जना सशस्त्र प्रहरी टोली पहिलो पटक तैनाथ गरिँदैछ । छाङरुमा सशस्त्र प्रहरी चौकी स्थापना गर्न एआइजी नारायणबाबु थापा, डिआइजी हरिशंकर बुढाथोकी र गृहमन्त्रीका सुरक्षा सल्लाहकार प्रा.डा. ईन्द्रजित राई दार्चुला पुगेका छन्।
