काठमाडौँ, १८ असार : अध्यक्ष पुष्पकमल दाहाल राष्ट्रपति विद्यादेवी भण्डारीलाई भेट्न शीतल निवास पुगेका छन्। नेपाल कम्युनिष्ट पार्टी (नेकपा) भित्रको विवाद तीव्र हुँदै जाँदा प्रधानमन्त्री तथा नेकपा अध्यक्ष केपी शर्मा ओलीसँग बालुवाटारमा कुनै संवाद हुन नसकेपछि उनी त्यहाँ पुगेके बताइएको छ ।
नेकपा स्थायी समिति बैठक प्रधानमन्त्री तथा अध्यक्ष ओलीको अनुपस्थितिका कारण अघि बढ्न नसकेपछि नेकपाका अर्का अध्यक्ष पुष्पकमल दाहालसहित शीर्ष नेताहरु माधवकुमार नेपाल, झलनाथ खनाललगायत प्रधानमन्त्री ओलीको आवासतर्फ गएका थिए।
यद्यपि प्रधानमन्त्री ओलीसँग उनीहरुको संवाद हुन नसकेको तर ओली इतरका नेताहरु दाहाल, नेपाल, खनाललगायत बालुवाटारमा केही बेर वार्ता बसेका थिए। त्यसपछि दाहाल राष्ट्रपति भण्डारीलाई भेट्न शीतल निवास पुगेका छन्।
प्रधानमन्त्री ओलीको भारतलाई लगाएकाे आरोपसँग असन्तुष्ट नेकपाका शीर्ष नेताहरुले प्रधानमन्त्री तथा अध्यक्ष दुवै पदबाट उनको राजीनामा मागेपछि नेकपाको द्वन्द्व वार कि पारको स्थितिमा पुगेको छ। दाहाल- नेपाल पक्षलाई फकाउने ओलीको प्रयास असफल हुँदै गएपछि प्रधानमन्त्री ओली बिहीबारको स्थायी समिति बैठकमा अनुपस्थित भएका हुन्।
नेकपाभित्र प्रधानमन्त्री ओलीको विपक्षमा माहोल चर्कँदै गर्दा मन्त्रिपरिषद्को सिफारिसमा राष्ट्रपति विद्यादेवी भण्डारीले संसद बैठक अन्त्य गरेकी छन्।प्रधानमन्त्री ओलीले बिहीबार राष्ट्रपति निवास गई राष्ट्रपति विद्यादेवी भण्डारीसँग करिब ४० मिनेट वार्ता गरेका थिए।
