काठमाडौँ, २१ असारः नेपालमा कोरोना भाइरसको संक्रमण दिनप्रतिदिन बढिरहदा परदेशमा पछिल्लो साता मात्रै थप १३ जना नेपालीको मृ’त्यु भएको छ । मृ’त्यु हुने नेपालीमा सबैभन्दा धेरै युएइमा रहेका छन ।
गैरआवासीय नेपाली संघ अन्तरर्गतको स्वास्थ्य समितिका अनुसार पछिल्लो साता मात्रै युएईमा ६ जना, भारतमा ५ जना, ओमानमा १ जना, कुवेत १ जना गरि थप १३ जना नेपालीको ज्यान गएको हो ।
समितिका अनुसार शनिबार साँझसम्म १४ देशमा १ सय ४३ जना नेपालीले कोरोनाबाट ज्यान गुमाएका हुन् । जसमा बेलायत, युएई, साउदी अरब, बहराइन, कुवेत, कतार, आयरल्याण्ड, जापान, टर्की, नेदरल्याण्ड र स्वीडेन, ओमान लगायत देशमा रहेका नेपालीहरुको कोरोना भाइरस संक्रमणका कारण ज्यान गएको छ ।
त्यस्तै समितिका अनुसार हाल सम्म विश्वभर ३७ देशमा रहेका नेपालीहरु कोरोना भाइरसबाट प्रभावित भएका छन् । जसमा हालसम्म मुलुक बाहिरका बिभिन्न देशहरूमा २८ हजार ९ सय १८ जनामा कोरोना संक्रमण देखिएको छ। जसमा २५ हजार २ सय २६ जनाले कोरोनालाइ जितेका छन् ।
नेपालमा १५ हजार ४ सय ९४ जनामा कोरोना संक्रमण देखिए पनि हाल सम्म ६ हजार ४ सय १५ जना कोरोना मुक्त भएका छन् । यस्तै ३४ जनाले ज्यान गुमाएका छन् ।
