–तिलकराज विश्वकर्मा
सुर्खेत २४ पौष । सुर्खेतको भेरीगंगा नगरपालिका–१० छिन्चुमा टिपरले मोटरसाइकललाई ठक्कर दिँदा एक युवतीको मृत्यु भएको छ। सुर्खेतबाट नेपालगञ्जतर्फ गइरहेको कर्णाली प्रदेश ००१ क ००९९ नम्बरको टिपरले सोही दिशातर्फ गइरहेको भे ७ प ५२०६ नम्बरको मोटरसाइकललाई ठक्कर दिएको हो।
ठक्करबाट घाइते भएकी वीरेन्द्रनगर–११ की २३ वर्षीया ताराकुमारी आलेको मृत्यु भएको हो।उनलाई उपचारका लागि कर्णाली प्रदेश अस्पताल ल्याउँदै गर्दा बाटोमै मृत्यु भएको जिल्ला प्रहरी कार्यालय सुर्खेतले जनाएको छ।
घटना बिहान साढे १२ बजेको हो। उक्त घटनामा कालिकोटको शुभकालिका गाउँपालिकाका २६ वर्षीय मोटरसाइकल चालक दुर्गा शाही घाइते छन्। उनको अवस्था सामान्य रहेको जिल्ला प्रहरी कार्यालय सुर्खेतका प्रवक्ता प्रहरी नायब उपरीक्षक रामप्रसाद घर्तीले जानकारी दिए।
टिपर र चालकलाई ईलाका प्रहरी कार्यालय छिन्चुले नियन्त्रणमा लिएको उनले बताए। घटनापछि छिन्चु बजार तनावग्रस्त बनेको छ। स्थानीयले आन्दोलन गर्ने तयारीसहित सवारी साधन रोक्न थालेका छन्।
