के तपाई डेढ क्विन्टल सुनले बनेको बाथटबमा नुहाउन चाहानुहुन्छ्
एजेन्सी । पैसा हुनेहरुका लागि के छैन र यो दुनियामा ? रकम खर्चिने हो भने अब सुनको बाथटबमा समेत नुहाउन पाइने भएको छ ।
जापानको एउटा रेष्टुरेन्टले ग्राहकहरुलाई लग्जरी महसूस गराउनका लागि सुनको बाथटब जडान गरेको छ ।
नागासाकी सहरस्थित जापान हट स्प्रिंग रिसोर्टमा उक्त सुनको बाथटब बनाइएको हो । सो बाथटब बनाउन करिब ८ महिनाको समय लागेको थियो भने करिब ८० करोड रुपैयाँ बराबरको रकम खर्च भएको थियो ।
सो विशेष बाथटब १३० सेमी चौडा र ५५ सेमी गहिरो रहेको छ । करीब डेढ क्विन्टल अर्थात् १५४.२० किलो सुनको प्रयोग गरी उक्त बाथटब बनाइएको छ । उक्त बाथटबमा एक पटकमा एक जोडीले मज्जाले नुहाउन सक्दछन् । उक्त बाथटब निर्माता हुइस टेन बचका अनुसार यो दुनियाकै पहिलो सुनको बाथटब हो । यसमा १८ क्यारेटको सुन प्रयोग गरिएको छ ।
यो बाथटबमा नुहाउनका लागि १ देखि १० घण्टासम्म बुकिङ गर्न सकिन्छ । यसका लागि प्रतिघण्टा ५४ सय यान अर्थात् झण्डै ५ हजार रुपैयाँ बराबरको रकम तिर्नु पर्दछ । उक्त रिसोर्टका अनुसार चीन र दक्षिण कोरियाबाट आउने पर्यटकलाई लक्षित गरी सो बाथटब बनाइएको हो किनकी चिनियाँ र कोरियाली पर्यटकले विशेष बाथटबको माग गर्दछन् ।
यो बाथटबले उदघाटनकै दिन दुनियाकै पहिलो सुनको बाथटबको रुपमा गिनिज बुकमा नाम लेखाएको छ ।
