मोदीलाई एक्कासि तेजबहादुरको चूनौती

एजेन्सी ।  शुक्रबार भारतीय प्रधानमन्त्री नरेन्द्र मोदीले वराणसमा लोकसभा निर्वाचनका लागि उम्मेद्वारी दर्ता गरिरहँदा उनका सामू एक कडा चुनौती थियो । त्यहाँको समाजवादी पार्टी र बहुजन समाजवादी पार्टीको गठबन्धनको तर्फबाट शालिनी यादव उम्मेद्वारको रुपमा रहेकी थिइन् । तर सोमबार सो गठबन्धनले एकाएक उम्मेद्वार परिवर्तन गरेपछि अहिले नयाँ बहस सृजना भएको छ । सो गठबन्धनले सेनाका एक जवानलाई एकाएक उम्मेद्वारका रुपमा अघि सारेको छ ।

विएसएफले केही वर्ष अघि बर्खास्त गरेका जवान तेजबहादुर यादव उम्मेद्वारको रुपमा अघि आएका छन् । गठबन्धनले यादवलाई उम्मेद्वारको रुपमा अघि सारेलगत्तै दिल्लीका मुख्यमन्त्री अरविन्द केजरीवालले गठबन्धन नेतृत्वलाई बधाई दिएका छन् ।

सन् २०१४ मा केजरीवालले वनारसमा मोदीलाई चुनौती दिएका थिए तर उनी त्यसबेला त्यहाँबाट पराजित भएका थिए । तेजबहादुर यादव तिनै जवान जो २ वर्षअघि फौजभित्रको खाद्यान्नको समस्यालाई उठान गर्दा कार्वाहीमा परेका थिए । उनले बोलेको भिडियो सञ्चारमाध्यामहरुमा भाइरल बनेको थियो ।

प्रधानमन्त्री नरेन्द्र मोदीले आफ्नो भाषणमा राष्ट्रवाद, देशभक्ति र सेनाका बारेमा उल्लेख गर्न भुलेका छैनन् । उनी अधिकांश बेला आफ्नो सेना मजबुत रहेको बताउँछन् । सोही बलमा सर्जिकल स्ट्राइक र एयर स्ट्राइकलाई कामयाबी बनाउन सकिएको भन्ने छ ।

बनारसको चुनावी मैदानमा अहिले प्रधानमन्त्री मोदीका विरुद्धमा काँग्रेस आईका उम्मेद्वार अजय राय पनि चुनौतीका रुपमा उदाएका छन् । रिटायर्ड जवान तेजबहादुर र रायले मोदीलाई कति चुनौती दिन सक्छन् त्यो त अबको करिब ३ हप्ताभित्र देखिनेछ । वनारसमा मे १९ मा निर्वाचन हुँदैछ ।

दुई वर्षअघि सामाजिक सञ्जाल र सञ्चारमाध्याममा तेजबहादुरले बोलेको भिडियो भाइरल बनेको थियो । उनले फौजीलाई गुणस्तरीय खाना उपलब्ध नगराएकोे भन्ने उनको अभिव्यक्तिसहित भिडियो भाइरले भएपछि राजनीतिक रुपमा समेत हलचल मच्चिएको थियो ।

उनले आफुहरुको आवाज कसैले नसुन्ने र गृहमन्त्रालयले पनि त्यसको सुनुवाई नगरेको आरोप लगाएका थिए । फौजीमा गुणस्तरहिन खाद्यान्नको सवाल उठेपछि विएसएफले जाँचबुझ समिति गठन गरेको थियो । त्यसलगत्तै यादव कार्वाहीमा परेका थिए ।

हरियाणाका यादव अहिले राजनीतिमा सक्रिय छन् । हरियाणाका तेजबहादुर आखिर वनारसबाट किन उम्मेद्वार बने ? यो प्रश्नमा उनले प्रधानमन्त्री मोदीले सेनाभित्र राजनीति गर्ने गरेको र उनलाई हराउनकै लागि निर्वाचन लड्न लागेको बताए ।

तेजबहादुरले भने, म काशी विश्वनाथसँग यही प्राथना गर्छु, म नक्कली चौकीदारलाई हराएरै छाडौं । जो व्यक्ति सेनाभित्र राजनीति गर्छन्, उनलाई म चुनौती दिन चाहन्छु । मोदीले हाम्रो फौजको नाम बदनाम गरिदिए । जसका कारण जवानको हौसला कमजोर भएको छ ।’ उरी हमलापछि सेनाले गरेको सर्जिकल स्ट्राइक र यही साल पुलुवा हमलापछि वायुसेनाले गरेको एयर स्ट्राइकको श्रेय भाजपा नेता कार्यकर्ता र प्रधानमन्त्री मोदीले लिने गरेका छन् ।

सोही मौकामा प्रधानमन्त्री मोदीले अघिल्ला सरकारहरुलाई सेनालाई सहयोग नगरेको आरोप लगाउने गरेका छन् । त्यही कारण देशमा धेरै आक्रमण हुने गरेको समेत उनले आरोप लगाउने गरेका छन् ।
यसबारे तेजबहादुर यादव भन्छन्, ‘यो होइन कि देशको सेनाले पहिलो पटक सर्जिकल र एयर स्ट्राइक गरेको हो, यसभन्दा पहिले पनि सेनाले यो काम गर्दै आएको थियो । तर यसरी सेनाभित्र राजनीति भने हुने गरेको थिएन । त्यो राजनीति थिएन । अहिलेको सरकार सेनाभित्र राजनीति गरिरहेको छ, त्यही भएर यसको जवाफ दिन म चुनावी मैदानमा आएको हुँ ।’ तेजबहादुरले भने, ‘जबसम्म देशका जवान संसदमा पुग्दैनन्, तबसम्म यो देश बचाउन सकिँदैन ।’

पुलवामा किन र कसले गर्यो हमला ?

प्रधानमन्त्री मोदी दोश्रो तहका भारतीय नेताहरुले चुनावी र्यालीमा भन्ने गरेका छन् कि मोदीको नेतृत्वमा भारत निकै बलियो भएको छ । यो सवालमा तेजबहादुरले भनेका छन्, ‘यदि भारत निकै बलियो भएको हो भने पुलवामा कसले र कसरी आक्रमण भयो ?’ उनले भने, ‘यदि प्रधानमन्त्री मोदी र उनको नेतृत्वको डर अरु देशलाई हुँदो हो त पुलवामा किन र कसले आक्रमण गर्यो ? आजसम्म यति ठूलो हमला सेनामाथि कहिल्यै भएको थिएन ।’

आखिर को हो सक्कली चौकीदार ?

जवान तेजबहादुरले आफ्नो चुनावी प्रचार प्रसारको पोष्टरमा आफुलाई देशको असली चौकीदार दाबी गरेका छन् । उनले प्रधानमन्त्री मोदीले चुनावकै मुखमा दिएको ‘आफु देशको चौकीदार’ भन्ने नारा नक्कली भएको समेत दाबी गरेका छन् । उनले भनेका छन्, यत्रो वर्ष सीमाको चौकीदारी मैले गरे, त्यसैले म यो देशको असली चौकीदार हुँ ।’

उनले मोदीसँग जोडिएको रफाल मामलालाई समेत जोड्न भ्याएका छन् । उनले भनेमन छन्, मोदीजी आफुलाई देशको असल चौकीदार भन्नुहुन्छ तर रफाल घोटालाको फाइलचाहि कसले चोर्यो नि । यसमा निरव मोदी लगायतका तमाम व्यक्तिहरु भागिसकेका छन्, आखिर उनी कसरी चौकीदार भए ?’ यादवले आफ्ना केही समर्थक फौजी साथीहरु पनि बनारस आउन लागेको जानकारी दिएका छन् ।