मकवानपुर । तीन वर्षीया नाबालिकालाई बलात्कार गरेको आरोपमा एक शिक्षक पक्राउ परेका छन् । पश्चिमी मकवानपुरको मनहरी गाउँपालिकास्थित नीजी विद्यालयमा एल केजीमा अध्ययन गर्ने छात्रालाई बलात्कार गरेको भन्दै शिक्षक अमन लामालाई बिहीबार प्रहरीले पक्राउ गरेको हो ।
छात्रालाई विद्यालयकै शौचालयमा सोमबार बलात्कार गरेको उजुरी परेपछि २२ वर्षीय लामालाई पक्राउ गरिएको इलाका प्रहरी कार्यालय मनहरीका प्रहरी निरिक्षक विरेन्द्र पनेरुले बताए ।
बालिका बलात्कार गरेको भन्दै पीडित पक्षले बिहीबार इलाका प्रहरी कार्यालय मनहरीमा किटानी जाहेरी दिएका थिए । उजुरीका आधारमा पक्राउ परेका लामामाथि बलात्कार (जबर्जस्ती करणी)मा मुद्दा चलाइने प्रहरीले जनाएको छ ।
यसैबीच, एक १५ बर्षिया बालिकालाई जबरजस्ती करणी गरेको आरोपमा मंगलबार हेटौंडा उपमहानगरपालिका ५ पिप्लेका ४५ वर्षीय हिरालाल चौंलागाई पक्राउ परेका थिए । हेटौंडा उपमहानगरपालिका २ मा डेरा गरी बस्ने बालिकालाई शनिबार बलात्कार गरेको भन्ने सूचनाका आधारमा उनलाई मंगलबार पक्राउ गरेको जिल्ला प्रहरी कार्यालय मकवानपुरका प्रमुख एवम् मुकेशकुमार सिंहले बताए ।
बढ्दैछन् बलात्कारका घटना
मकवानपुरमा बिगत तीन आर्थिक वर्षको तथ्याङ्कलाई हेर्दा चालु आर्थिक वर्षमा सबैभन्दा बढी बलात्कारका घटना भएका छन् । आर्थिक बर्ष २०७५/७६ को चैतसम्मको ९ महिनाको अवधिमै २५ वटा बलात्कारको घटना दर्ता भएको जिल्ला प्रहरी कार्यालय मकवानपुरमा प्रमुख एवम् प्रहरी उपरिक्षक मुकेशकुमार सिंहले बताए ।
उनका अनुसार सबैभन्दा बढी बलात्कारका घटना २०७५ को कात्तिक र चैतमा ५/५ वटा भएका छन् । त्यस्तै, बलात्कृत हुनेमा सबैभन्दा धेरै १६ देखि २५ बर्ष उमेर समूहका १४ जना युवती र १६ बर्षभन्दा मुनिका ७ जना बालिका रहेको प्रहरीको तथ्याङ्क छ ।
त्यस्तै, गत आर्थिक बर्ष २०७४/७५ मा २१ वटा बलात्कारको घटना दर्ता भएको मकवानपुरमा आर्थिक बर्ष २०७३/७४ मा २२ वटा र २०७२/७३ मा १९ वटा बलात्कार घटना दर्ता भएको प्रहरीले जनाएको छ ।
