लुम्बिनीमा धुमधामका साथ बुद्ध जयन्ती मनाइँयो
भैरहवा । शान्तिका अग्रदुत गौतमबुद्धको जन्मस्थल लुम्बिनीमा धुमधामकासाथ २५६३ औँ बुद्ध जयन्ती मनाइँयो । बुद्ध जयन्तीका अवसरमा विभिन्न मुलुकका बौद्ध धर्मालम्बीहरू लुम्बिनी आइपुगेका छन् । लुम्बिनीलाई दुलही झैं सिंगारिएको छ ।
बुद्ध जयन्ती समारोहमा सहभागी हुन राष्ट्रपति विद्यादेवी भण्डारी कार्यक्रमस्थ पुगेकी छिन् । लुम्बिनी परिषरमा झाकीसहितको र्याली निकालिएको छ । शुक्रबार नै लुम्बिनी आइपुगेका प्रधानमन्त्री केपी ओलीले बुद्ध जयन्तीका अवसरमा निकालिएको र्यालीमा सहभागी भई थाइ बिहारमा भिक्षुहरूलाई चिवर दान गरेका छन । उनले लुम्बिनी परिषरमा २ हजार ६ सय ४३ वटा बिरुवा रोप्ने कार्यक्रमको पनि शुभारम्भ गरे ।
यसै अवसरमा प्रदेश सरकारले घोषणा गरेको लुम्बिनी भ्रमण वर्ष २०७६ को राष्ट्रपति भण्डारी र प्रधानमन्त्री ओलीले उदघाटन गरेका छन् । प्रदेश ५ सरकारले २०७६ लाई लुम्बिनी भ्रमण वर्ष घोषणा गर्दै २० लाख पर्यटक भित्र्याउने लक्ष्य राखेको छ । लुम्बिनी र प्रदेशका विभिन्न धार्मिक, ऐतिहासिक, साँस्कृतिक तथा पुरातात्विक महत्वका क्षेत्रहरूको पहिचान, संरक्षण र प्रवर्द्धन गर्ने उद्देश्यले प्रदेश सरकारले २०७६ लाई लुम्बिनी भ्रमण वर्षको रुपमा मनाउन थालेको हो । बुद्धको महापरिनिर्वाणपछि बुद्ध जयन्ती मनाउन थालेको २५६३ बर्ष पूरा भएको र उनको जन्म त्यसभन्दा ८० बर्ष पहिले भएकाले बुद्धको जन्मको सम्झनास्वरुप २ हजार ६ सय ४३ वटा बिरुवा रोप्ने कार्यक्रम राखिएको लुम्बिनी विकास कोषका सदस्य सचिव सरोज भट्टराईले बताए ।
लुम्बिनी पुग्नै सकस
बुद्ध जयन्तीमा लुम्बिनी जान चाहने पर्यटकलाई निकै सकस भएको छ । धुलाम्मे सडकका कारण लुम्बिनी पुगेका पाहुना तथा पर्यटकहरूले निकै सास्ती खेप्नु परेको छ । भैरहवा–लुम्बिनी–तौलिहावा सडकखण्ड निर्माणाधीन अवस्था छ । जसका कारण पुरै सडक धुलाम्मे छ ।
सुरक्षा व्यवस्था कडा
बुद्ध जयन्ती समारोहका लागि लुम्बिनीको सुरक्षा व्यवस्था कडा पारिएको छ । चार वटै सुरक्षा निकाय नेपाली सेना, नेपाल प्रहरी सशस्त्र प्रहरी अुसन्धान विभाग परिचालन भएका छन् । लुम्बिनीको कुना–कुनामा सुरक्षाकर्मीहरू खटाइएको छ ।
