काठमाडौं । सिके राउत नेतृत्वको ‘जनमत पार्टी’लाई निर्वाचन आयोगको सोमबार बसेको बैठकले दर्ता गर्ने निर्णय गरेको छ । निर्वाचन आयोगका प्रवक्ता शंकर प्रसाद खरेलले दल दर्ता गर्ने निर्णय भएको जानकारी दिए ।
सरकारसँग २४ फागुनमा सहमति गरे लगत्तै मधेस झरेका राउतले गठबन्धनको भेलाबाट जनमत पार्टी घोषणा गरेका थिए । स्वतन्त्र मधेस गठबन्धनका नाममा पृथकतावादी गतिविधि गरिरहेका राउतले संविधान बमोजिम गतिविधि गर्ने ११ बुँदे सहमति गरेर मूल धारको राजनीति सुरु गरेका हुन् । राउतले वैशाख १५ गते निर्वाचन आयोगमा दल दर्ताको लागि निवेदन दिएका थिए ।
जनमत पार्टीका केन्द्रीय सदस्य चन्दन सिंहले आयोगमा दल दर्ता गरेको बताए । ‘दल दर्तापछि हामी औपचारिक रुपमा संगठन विस्तारमा केन्द्रीत हुन्छौं,’ उनले भने ।
