आठ विधेयक संघीय संसदमा

काठमाडौं ।  संघीय संसदमा विभिन्न आठवटा विधेयकमाथिको कारबाही अघि बढेको छ । दुवै सदनको छुट्टाछुट्टै बसेको बैठकअन्तर्गत प्रतिनिधिसभामा ६ र राष्ट्रिय सभामा दुई विधेयकमाथिको प्रक्रिया अघि बढेको हो । प्रतिनिधिसभामा ‘राजस्व चुहावट (अनुसन्धान तथा नियन्त्रण) पहिलो संशोधन विधेयक’ प्रस्तुत भएको छ ।

प्रधानमन्त्री केपी ओलीका तर्फबाट अर्थमन्त्री डा. युवराज खतिवडाले विधेयक संसदमा प्रस्तुत गरेका हुन् । गृहमन्त्री रामबहादुर थापाले प्रहरी समायोजन विधेयक पेस गरे । त्यस्तै, उद्योगमन्त्री मातृका यादवले औद्योगिक व्यवसाय विधेयक, वनमन्त्री शक्तिबहादुर बस्नेतले वन विधेयक तथा वातावरण संरक्षण विधेयक, भूमि व्यवस्था, सहकारी तथा गरिबी निवारणमन्त्री पद्मा अर्यालले भूमिसम्बन्धी (आठौँ संशोधन) विधेयक प्रतिनिधिसभामा प्रस्तुत गरिन् ।

राष्ट्रिय सभामा दुई विधेयक

राष्ट्रिय सभाको सोमबारको बैठकमा गुठी विधेयक पेस भएको छ । भूमि व्यवस्था, सहकारी तथा गरिबी निवारणमन्त्री पद्ममा अर्यालले विधेयक पेस गरेकी हुन् । प्रमाण दोस्रो संशोधन विधेयकमाथि विचार गरियोस् भन्ने प्रस्ताव राष्ट्रिय सभाबाट सर्वसम्मतले स्वीकृत भएको छ । कानुनमन्त्री भानुभक्त ढकालले ‘विचार गरियोस्’ भन्ने प्रस्ताव प्रस्तुत गरेका थिए ।

राजपाले फेरि खोज्यो लाल आयोगको प्रतिवेदन

संसदको सोमबारको बैठकमा राजपाकी सांसद चन्दा चौधरीले लाल आयोगको प्रतिवेदन सार्वजनिक नभए सदन अवरोधलाई फेरि दोहो(याउने बताइन् । ‘सरकारले सभामुखको रुलिङ किन मानिरहेको छैन ? यसप्रति तपाईं गम्भीर हुनुस्,’ सांसद चौधरीले भनिन् । सभामुख कृष्णबहादुर महराले आफ्नो त्यस विषयप्रति ध्यानाकर्षण कायमै रहेको र सरकारले प्रतिवेदन सार्वजनिक नगरेको विषयमा कारणसहित जवाफ केही समयपछि दिने बताए ।

के हो लाल प्रतिवेदन ?

तराई, मधेस र थरुहट लगायतका क्षेत्रमा विभिन्न राजनीतिक दलहरूले गरेको आन्दोलनका क्रममा भएका हिंसा, हत्या, आगजनी, तोडफोडलगायतका घटनाको सत्यतथ्य छानबिन गर्न सरकारले २ असोज ०७३ मा उच्चस्तरीय जाँचबुझ आयोग, ०७३ गठन गरेको थियो । सर्वोच्च अदालतका पूर्वन्यायाधीश गिरीशचन्द्र लालको अध्यक्षतामा सात सदस्यीय आयोगलाई ६ महिनाको समय दिइएको थियो ।

आयोगमा दर्ता भएका १३ सय २६ र मधेसवादी राजनीतिक दलमार्फत आएका १९ सय ३८ सहित आयोगले ३२ सय ६४ उजुरीमाथि छानबिन गरेको थियो । आयोगले कैलालीको टिकापुरदेखि काठमाडौंसम्मका नौ जिल्लाको स्थलगत अवलोकन गरी प्रतिवेदन तयार गरेको थियो ।