काठमाडौं । राष्ट्रपति विद्यादेवी भण्डारीले राहदानी विधेयकलाई प्रतिनिधि सभामा फिर्ता पठाएकी छिन् । सभामुख कृष्णबहादुर महराले संविधानको धारा ११३ को उपधारा (२) बमोजिम प्रमाणीकरणका लागि पठाएको राहदानी सम्बन्धी कानूनलाई संशोधन र एकीकरण गर्न बनेको विधेयकलाई राष्ट्रपति भण्डारीले बुधबार प्रतिनिधिसभामा फिर्ता पठाएकी हुन् ।
राष्ट्रपति कार्यालयका प्रवक्ता छविन्द्र पराजुलीका अनुसार संविधानको धारा ११३ को उपधारा (३) बमोजिम पुनर्विचार गर्न भन्दै भण्डारीले विधेयक फिर्ता पठाएकी हुन् ।
राहदानी विधेयकलाई राष्ट्रिय सभामा पेश नगरी राष्ट्रपतिकहाँ सिधै प्रमाणीकरणका लागि पठाएपछि विरोध भएको थियो । मंगलबार मात्रै राष्ट्रपति भण्डारीले राष्ट्रिय सभा सदस्य रामनारायण विडारी र राधेश्याम अधिकारीलाई शीतलनिवास बोलाएर विधेयकबारे राय लिएकी थिइन् ।
