मानसिक राेगीलाई बाेक्सीकाे आराेप लगाएपछि प्रहरी नियन्त्रणमा

झापा : झापा मेचीनगर ९ बाट एकजना मातालाई प्रहरीले नियन्त्रणमा लिएकाे छ । साेही मेचीनगर ९ मा बस्दै बस्ने ८१ वर्षीया वृद्धालाई बोक्सीको आरोप लगाउने माता पवित्रा शिवाकोटीलाई प्रहरीले नियन्त्रणमा लिएको हाे । बिहीबार माता भनिने शिवाकोटीविरुद्ध किटानी जाहेरी परेपछि जिल्ला अदालत झापाबाट पक्राउ पुर्जी जारी गरी प्रहरीले नियन्त्रणमा लिएको हो।

ईलाका प्रहरी कार्यालय धुलाबारीका प्रहरी निरीक्षक टीकाबहादुर कार्कीले शिवाकोटीमाथि अनुसन्धान सुरु भएको जानकारी दिए। प्रहरीको नियन्त्रणमा पनि बेला बेला उनी काम्ने चिच्याउने गर्दै आएको कार्कीको भनाइ छ।

आफूलाई दैवि शक्ति प्राप्त भएको भन्दै झारफुक गर्ने नाममा शिवाकोटीले ८१ वर्षीया वृद्ध महिलालाई बोक्सीको आरोप लगाएकी थिइन्। विगत लामो समयदेखि मानसिक रोगी रहेकी वृद्ध महिलाकी छिमेकी कुमारी चम्लागाईलाई केही दिनअघि उपचार गर्ने नाममा यातना दिएर माताले जबरजस्ती हातमा चक्कु त्रिशुल देखाएर बृद्धको नाम बकाएर बोक्सीको आरोप लगाएकी थिइन्।

पक्राउ परेकी माता भनिने शिवाकोटीलाई बोक्सीको आरोप लगाउने विरुद्धको कानुनी कारबाहीको प्रक्रिया अगाडि बढाउने प्रहरी निरीक्षक कार्कीले बताए।