बोलेरो जीप पल्टिदा ५ काे मृत्यु, १० घाइते

काठमाडौं : धादिङमा तरकारी बाेकेकाे जीप पल्टिदा ५ जनाकाे मृत्यु भएकाे छ भने १० जना घाइते भएका छन् । गल्छी गाउँपालिका-६ बाँझगाउँमा शुक्रबार बोलेरो जीप पल्टिदा पाँचजनाको मृत्यु भएको हाे । गल्छी गाउँपालिका-५ को सिरुवारीबाट बैरेनी गइरहेको बा १८ च ९४०८ नम्बरको तरकारी बोकेको जीप कच्ची सडकमा अनियन्त्रित भएर दुर्घटना भएकाे प्रहरीले जनाएकाे छ ।

दुर्घटनामा परी गल्छी गाउँपालिका- ४ का ३८ वर्षीय सेते मिजार, गल्छी गाउँपालिका-६ का ३० वर्षीय कान्छी भुजेल, २५ वर्षीय नानु तामाङ र २५ वर्षीय राजु रम्तेलको घटनास्थलमै मृत्यु भएको छ भने २१ वर्षीया समिक्षादु अधिकारीको उपचारका लागि अस्पताल लिने क्रममा बाटोमा मृत्यु भएको प्रहरी चौकी बैरेनीले जनाएकाे छ । दुर्घटनामा परि अन्य १० जना घाइते भएका छन् ।

घाइतेहरुको स्थानीय स्वास्थ्य चौकीमा उपचार गरेर थप उचारका लागि काठमाडौं लगिएको छ । बोलेरो जीप माथिल्लो सडकबाट पल्टेर अर्को सडकमा बजारिएको थियो।