प्रभासको नयाँ फिल्म ‘साहो’को रिलिज डेट १५ दिनपछि धकेलिदा, फ्यानहरू अकुलिए

काठमाडाैं : पछिल्लो समय चर्चामा रहेको फिल्म ‘साहो’ को रिलिज मितिमा हेरफेर भएको छ । पहिले फिल्म आउँदो अगस्त १५ मा रिलिज हुने भनिएको थियो । अब भने १५ दिन पछाडि धकेलिएको निर्माण टिमले बताएको छ ।

अगस्त १५ मा बलिउडमा अन्य २ ठूला फिल्म पनि रिलिज हुँदैछन् । जोन अब्राहमको फिल्म ‘बाटला हाउस’ र अक्षय कुमारको फिल्म ‘मिसन मंगल’ १५ अगस्तमा रिलिज हुँदैछन् । जसकारण प्रभास अभिनित फिल्म ‘साहो’ को रिलिज मितिमा हेरेफेर गरिएको हो ।

‘साहो’ टिमले सामाजिक सञ्जालमा एक नोटिस जारी गर्दै रिलिज मितिमा परिवर्तन गरिएको बताए । यो फिल्म ३० अगस्तमा रिलिज हुनेछ । लामो समयदेखि प्रतीक्षा गरिएकाे यो फिल्म पछाडि धकेलिएपछि प्रभासका फ्यानलाई अझै लामो समय कुर्नुपर्ने भएको छ ।

फिल्ममा ‘बाहुबली’ स्टार प्रभास र श्रद्धा कपूरले जोडी बाँधेका छन् भने नील नितिन मुकेश, ज्याकी श्राफ, मन्दिरा बेदी, चंकी पाण्डे लगायतका कलाकारले समेत अभिनय रहेकाे छ । यो फिल्म एकैसाथ हिन्दी, तेलुगू र तमिल भाषामा रिलिज हुँदैछ ।