खेल जीवनबाट रिटायर हुँदै मालिंगाः यस्तो रह्यो उनको क्रिकेट यात्रा
एजेन्सी : श्रीलंका क्रिकेट टोलीका प्रभावशाली फास्ट बलर लासिथ मालिंगाले यसै महिना एकदिवसीय अन्तर्राष्ट्रिय क्रिकेटबाट सन्यास लिने घोषणा गरेका छन् । ३५ वर्षीय मालिंगाले यसै महिना सुरु हुने बंगलादेशविरुद्को एकदिवसीय अन्तर्राष्ट्रिय क्रिकेट शृंखलाका क्रममा सन्यास लिन लागेका हुन् । मालिंगाले बंगलादेशविरुद्को पहिलो खेलपछि एकदिवसीय क्रिकेटबाट सन्न्यास लिने बताएका हुन् । श्रीलंका र बंगलादेशबीचको पहिलो एकदिवसीय क्रिकेट आगामी शुक्रबार कोलम्बोमा खेलिने छ ।
मालिंगाको सन्यासपछि श्रीलंकाली टोलीमा अनुभवी बलरको अभाव खट्किने छ । श्रीलंकाका कप्तान दिमुथ करुणारत्ने पनि यो कुरामा सहमत छन् । ‘मालिंगाको सन्न्यास हाम्रा लागि निकै ठूलो क्षति हो । तत्काल उनको अभाव पूरा गर्ने अर्को बलर अहिले हामीसँग छैन’, करुणारत्ने भन्छन्, ‘बंगलादेशविरुद्को शृंखलापछि हामीले सबैभन्दा बढी विश्वास गरेको बलर हामीसँग हुने छैनन् । त्यसैले उनको विकल्प खोज्नु हाम्रा लागि सबैभन्दा ठुलो चुनौती हो ।’
मलिंगाले सन्यासको विषयमा आफूसँग पनि कुरा गरिसकेको करुणारत्नेले जनाएका छन् । हालै सम्पन्न विश्वकपमा श्रीलंका लिग चरणबाटै बाहिरिएको थियो । यद्यपि विश्वकपमा मालिंगाले सात खेल खेल्दै १३ विकेट लिएका थिए । मालिंगा उक्त विश्वकपमा सर्वाधिक विकेट लिने श्रीलंकाली बलर हुन् । विश्वकपमा अर्का श्रीलंकाली बलर इसुरु उडनाले सात खेल खेलेर ६ विकेटमात्र लिन सकेका थिए । ‘मालिंगाको सन्यासपछि हामीले अर्को विश्वकपलाई ध्यानमा राखी अहिलेदेखि युवा बलरको क्षमता अभिवृद्धिमा ध्यान दिनु आवश्यक छ’, करुणारत्ने भन्छन् ।
यस्तो रह्यो उनको क्रिकेट यात्रा
मालिंगाले सन् २००४ को जुलाई १७ मा संयुक्त अरब इमिरेट्विरुद्को खेलमार्फत एकदिवसीय प्रतियोगितामा ‘डेब्यु’ गरेका थिए । आफ्नो ‘डेब्यु’ खेलमा उनले एक विकेट लिएका थिए । उनले श्रीलंकाका लागि हालसम्म दुई सय २५ एकदिवसीयको दुई सय १९ पालिमा कुल तीन सय ३५ विकेट लिइसकेका छन् । एकदिवसीय क्रिकेटको उनको उत्कृष्ट प्रदर्शन ३८ रन दिएर ६ विकेट हो । उनले आठ खेलमा पाँच विकेट लिएका छन् भने ११ वटा खेलमा चार विकेट हात पारेका छन् ।
टेस्ट क्रिकेटमा भने उनले ३० खेलको ५९ पालिमा एक सय एक विकेट लिएका छन् । टेस्ट क्रिकेटमा उनको उत्कृष्ट प्रदर्शन ५० रन दिएर पाँच विकेट हो । टी-२० क्रिकेटलाई भने उनले आगामी दिनमा पनि निरन्तरता दिनेछन् । यसैगरी अन्तर्राष्ट्रिय टी-२० क्रिकेटमा उनले ७३ खेल खेल्दै ९७ विकेट लिएका छन् । टी-२० मा उनको उत्कृष्ट प्रदर्शन ३१ रन दिएर पाँच विकेट हो ।
