सागर ढकालले ५ विकेट लिएपछि नेपालकाे सानदार जीत

काठमाडौं : स्पिनर सागर ढकालले ५ विकेट लिएसँगै नेपाली यू१९ टोलीले दोस्रो अभ्यास खेलमा श्रीलंकाको बादुरेलिया सीसीलाई डकवर्थ लेविस पद्दतिको आधारमा ८० रनले पराजित गरेको छ । नेपालले प्रस्तुत गरेको १ सय ६५ रनको लक्ष्य पछ्याएको बादुरेलिया २३.१ ओभरमा अल आउट हुँदै ८४ रनमा समेटियो । उसका लागि अरिश्काले २१ रनको योगदान दिए । नेपालको जीतमा स्पिनर सागर ढकालले ५.१ ओभरमा १८ रन खर्चेर ५ विकेट लिए । त्यस्तै कमल सिंह ऐरी र पवन सरार्फले समान २ विकेट हात पारे । कुशल मल्लको नाममा १ विकेट रह्यो ।

त्यसअघि सरे क्रिकेट मैदानमा टस जितेर पहिला ब्याटिङ थालेको नेपाल ४६.४ ओभरमा अल आउट हुँदै २ सय ६ रनमा समेटियो । वर्षाको कारण खेल प्रभावित हुँदा बादुरेरियाले ३१ ओभरमा १ सय ६५ रनको लक्ष्य पाएको थियो । नेपालका लागि ओपनर रित गौतमले सर्वाधिक ७६ रनको योगदान दिए ।त्यस्तै विकेटकीपर हरि बहादुर चौहान ५६ रनमा बोल्ड आउट भए । एक समय २०।३ ओभरमा ८५–५ को कमजोर अवस्थामा पुगेको नेपाललाई रित र हरिले छैटौं विकेटका लागि उत्कृष्ट साझेदारी गर्दै सम्मानजक योगफलसम्म पुयाए ।

नेपालले पहिलो ओभरको दोस्रो बलमै ओपनर पवन सरार्फलाई शून्यमा गुमाएको थियो । खड्क बोहरा २, कप्तान रोहित कुमार पौडेल ३,आशिफ शेख १४ र सन्दीप जोरा २४ रनमा आउट भए । कुशल मल्ल डक आउट भए । नेपालले थप एक अभ्यास खेल खेल्ने छ । नेपाल पहिलो अभ्यास खेलमा एसएससी यू२३ सँग ३ विकेटले पराजित भएको थियो । यू१९ एसिया कप अघि नेपालले तयारी स्वरुप अभयास खेल खेलेको हो । सेप्टेम्बर ५ देखि १४ सम्म चल्ने एसीसी यू१९ एसिया कपमा नेपाल रहेको समुह बी मा दुई टेष्ट राष्ट्र श्रीलंका, बंगलादेश र युएई छन् । समुह ए मा भारत, पाकिस्तान, अफगानिस्तान र कुवेत छन् । नेपालले समूह चरण अन्तर्गत सेप्टेम्बर ६ मा घरेलु टोली श्रीलंका, सेप्टेम्बर ८ मा बंगलादेश र अन्तिम खेल सेप्टेम्बर १० मा यूएईसँग खेल्ने छ । समुह बी मा शीर्ष दुईमा रहन सके सेमिफाइनलमा प्रवेश गर्नेछ ।