विद्यार्थीहरुको कोठाकोठा पुगेर राहत वितरण

satkarpost२०७६ चैत्र २९

0 2

काठमाडौं, २९ चैत : कोरोना भाइरस (कोभिड-१९) ले विश्व भरी नै महामारीको रुप लिएपछि प्राय: देशहरुले लकडाउनको नीति लागू गरेका छन् । नेपालले पनि छिमेकी देश चीन र भारतकै सिको गरेका कारण देशभर लकडाउन गरिएको अवस्था छ ।

त्यहीँ लकडाउनका कारण काठमाडौं उपत्यका भित्र समस्यामा परेका विद्यार्थीहरुलाई पूर्वसांसद राजीव विक्रम शाहले व्यक्तिगत खर्चमा राहत वितरण गरेका छन् । जाजरकोटबाट पढ्नका लागि राजधानी आएका विद्यार्थीहरुलाई राहत वितरण गरेका हुन् ।

आफ्नै गाडीमा राहत सामग्री बोकेर विद्यार्थीहरुको कोठाकोठा पुगेर राहत वितरण गरेको नेपाली कांग्रेस जाजरकोट-काठमाडौं सम्पर्क मन्चका सदस्य दीपेन्द्र रानाले सत्कार पोष्टलाई जानकारी दिए । उनका अनुसार अहिलेसम्म ७० जनाभन्दा बढी विद्यार्थीहरुलाई राहत वितरण गरिएको छ ।

चामल, दाल, नुन, तेल र सोयाबिन लगायत खाद्य बस्तु पाएको कीर्तिपुर, पाँगा बस्ने कुसे- ३, जाजरकोटका तिलक बोहराले बताए । उनले राहत पाएपछि खुशी भएको बताएका छन् । उनले भने ‘बुवाआमा कामको सिलसिलामा भारतको नैनखरीमा हुनुहुन्छ, उताबाट यता आइएमई (IME) समेत गर्न पाउनु भएको छैन्, यस्तो अप्ठ्यारोमा परेको बेला राहत पाउँदा निकै खुशी भएको छु ।’