हार्दिक श्रद्धाञ्जली ! नेपालमै पहिलाे पटक काेराेनाले लियाे सुत्केरी महिलाकाे ज्यान
काठमाडौं, ३ जेठ : नेपालमै पहिलाेपटक कोरोना भाइरस (कोभिड-१९ बाट एक महिलाले ज्यान गुमाएकी छन् । कोरोनाबाट ज्यान गुमाउनेमा सिन्धुपाल्चोकको बाह्रबीसे नगरपालिका-९ निवासी २९ वर्षीया सावित्री तिम्सिना रहेकी छन्। त्रिवि शिक्षण अस्पतालमा वैशाख २३ गते भर्ना भएर सुत्केरी भएपछि वैशाख २५ मा डिस्चार्ज भएकी उनको बिहीबार राति १० बजे धुलिखेल अस्पतालमा ज्यान गएको हो।
तिमल्सिनाको कोरोना भाइरसबाट निधन भइको पुष्टि बागमती प्रदेशका सामाजिक विकासमन्त्री युजराज दुलाल ‘शरद’ ले गरेका छन् । त्रिवि शिक्षण अस्पतालबाट डिस्चार्ज भएर घर फर्केकी उनलाई उच्च ज्वरोसहित श्वास फेर्न गाह्रो भएपछि धुलिखेल अस्पतालमा ल्याइएको थियो। सिन्धुपाल्चकको राम्चेबाट रेफर गरिएपछि धुलिखेल ल्याइएकी उनले त्यहीँ ज्यान गुमाएकी हुन्।
उनको नौ दिनको शिशु रहेका छन् । कोरोनासँग मिल्दा लक्षण देखिएपछि ती महिलाको स्वाब संकलन गरेर धुलिखेलस्थित पिसिआर ल्याबमा परीक्षण गरिएको थियो । तर यसअघि गरिएको आरडिटी परीक्षणमा भने उनमा कोरोना नेगेटिभ देखिएको थियो । धुलिखेल अस्पतालमा कोरोना पोजेटिभ देखिएपछि उनको स्वाब पुन:परीक्षणका लागि टेकुस्थित राष्ट्रिय जनवस्वास्थ्य ल्याबमा ल्याइएको थियो। त्यहाँ दुई पटकसम्म गरिएको परीक्षणमा कोरोना पोजेटिभ देखिएको हाे ।
उनमा कोरोना देखिएपछि धुलिखेल अस्पतालमै पति, नन्द र सासुको पनि स्वाब लिइएको छ। उनीहरुको स्वाब अहिले परीक्षण भइरहेको छ। नेपालमा सबैभन्दा पहिले गत माघमा चीनबाट आएका युवकमा कोरोना देखिएको थियो । त्यसपछि देशमा २६ वटा जिल्लामा कोरोना पुष्टि भइसकेको छ। अहिलेसम्म नेपालमा २ महिने शिशुदेखि ८१ वर्षीया वृद्धामा पनि कोरोना देखिएको छ। नेपालमा सबैभन्दा धेरै पुरुषमा कोरोना देखिएको छ। महिलामा भने पुरूषको तुलनामा न्यून संक्रमण देखिएको छ। माघदेखि संक्रमण फैलिएको नेपालमा संक्रमितको संख्या २७८ पुगेपछि एकजनाकाे ज्यान गएकाे हाे । ३६ जनाले काेराेना जितेर घर फर्किसकेका छन् ।
