काठमाडाैं ।  पछिलो समय राजधानीलगायत देशका विभिन्न भागहरुमा मोटरसाइकल चोरीका घटनामा वृद्धि भइरहेको छ । राजधानीमा मात्रै दैनिक १ देखि दुईवटा मोटरसाइकल हराइरहेको घटना प्रहरी र ट्राफिक समक्ष निवेदन दर्ता भइरहेको हुन्छ । अन्य सवारी साधनको तुलनमा मोटरसाइकल र स्कुटर अत्याधिक बिक्री हुने र धेरै हराउने सवारी साधनको रुपमा चिनिएको छ । सार्वजनिक क्षेत्रमा पार्किङ गरेर राखेका मोटरसाइकल र स्कुटर हराउने गरेको कुनै नौलो कुरा भएन् । तर आफ्नो घरको हाताभित्र गेटमा ताला लगाएर सवारी साधन लक गरेर राख्दा समेत चोरी भएको घटना छ ।

प्रहरीले मोटरसाइकल चोरीको घटनामा वृद्धि भएपनि सोचे अनुरुप चोरीको गिरोह पक्राउ गर्न सकिरहेको छैन । राजधानीबाट चोरी भएका मोटरसाइकल राजधानी बाहिरका जिल्लाहरुबाट छिटपुट मात्रामा भेटिने गरेको समेत पाइएको छ । महानगरीय प्रहरी परिसर काठमाण्डौंका प्रहरी प्रमुख उत्तम सुवेदीले राजधानीबाट मोटरसाइकल चोरीको घटना बढेसँगै मोटरसाइकल चोरका विरुद्धमा कडा रुपमा प्रस्तुत भएको जानकारी दिए ।

एसएसपी सुवेदीका अनुसार मोटरसाइकल चोरी गरेपछि लुटेराले नम्बर प्लेट फेरबदल गरेर चलाउने गरेको पाइएको छ । उनले भने, ‘राजधानीमा मोटरसाइकल चोरीको घटनामा वृद्धि भएसँगै चोरीको मोटरसाईकल राजधानी आसपासका जिल्लाहरुमा जाने गरेको पाइएको छ ।’ चोरीको सूचनाको आधारमा अरु जिल्लाका प्रहरीसँग समन्वयन गरिरहेको र चोरीको गिरोहलाई समाउन छुटै सिभिल प्रहरीको विशेष युनिटले काम गरिरहेको समेत उनले बताए । पटक–पटक विभिन्न स्थानमा चोरी भएका मोटरसाइकलहरु प्राय काभ्रे, रामेछाप, दोलखा, सिन्धुपाल्चोक, धादिङ, मकवानपुरको पालुङलगायतको स्थानहरुमा प्रयोग भइरहेको प्रहरीकै दावी छ । आर्थिक बर्ष ०७५/०७६ मा १ हजार ३४५ वटा मोटरसाइकल हराएको निवेदन ट्राफिक महाशाखामा दर्ता भएको पाइएको छ । तिमध्ये ३०४ वटा फेला परेको छ ।

महानगरीय ट्राफिक प्रहरी महाशाखाका प्रुमुख बसन्त कुमार पन्तले मोटरसाइकल चोरीपश्चात् स्वरुप परिवर्तन तथा भिन्न रङ प्रयोग गरी मोटरसाइकल चलाउने प्रहरीको अनुसन्धानबाट खुलेको बताए । पक्राउ परेका मोटरसाइकल चोरी गर्ने गिरोहका सदस्यहरूले चोरीको मोटरसाइकल नेपालभित्रै १८ हजारदेखि २५ हजार सम्ममा बिक्री गर्ने गरेको प्रहरी स्रोतको दावी छ । मोटरसाईकल चोरी गर्ने गिरोह चोरी गर्दे जिल्ला बाहिर बेच्ने गरेका छन् । उनीहरुले दिउँसो एक वा दुई चार जनाको समूहमा विभाजन भई मोटरसाईकल पार्किङ, सवारी धनी र घरको पुन जानकारी गरेर मोटरसाईकल चोरी गरिरहेका छन् । प्रहरीका अनुसार चोरी गरेको मोटरसाइकलको नकली बिलवुक बनाई बेच्ने गरेको समेत खुलेको छ । मोटरसाइकल वा स्कुटर चोरी गरेपछि तुरुन्त नम्वर फेर्ने र स्वरुप परिर्वन गर्ने लगायतको काम हुने गरेको पाइएको छ ।

मोटरसाइकल चोरहरुलाई बेलाबखत प्रहरी मोटरसाइकलसहित पक्राउ पनि गर्दै आइरहेको छ तर सोचे अनुरुप मोटरसाइकल हराउने घटनामा भने कमि आएको छैन । मोटरसाइकल चोरलाई पछाउँदै बलम्वु प्रहरी मकवानपुरसम्ममहानगरीय प्रहरी प्रभाग बलम्वुले चोरीका दुई वटा मोटरसाइकलसहित एक जनालाई पक्राउ गरेको छ । चन्द्रागिरी–१२ दोम्बुटोलस्थित गोलभेडा टहराबाट राजेश तामाङ र रेशम तामाङले पार्किङ गरी राखेको प्रदेश ३-०२-००१ प ४५६२ नम्बरको २२० सिसिको निलो कलरको पल्सर मोटरसाइकल र बा८९प ७५९८ नम्बरको २२० सिसिको निलो कलरको पल्सर मोटरसाइकल चोरी भएको १८ घण्टामै चोरीको मोटरसाइकलसहित एक जनालाई पक्राउ गरेको हो ।

महानगरी प्रहरी प्रभाग बलम्वुका प्रहरी निरीक्षक शकंर खड्काले चोरी भएको भन्ने प्राप्त सूचानाको आधारमा प्रहरीले मकवनापुर, पालुङस्थित वडा एरियामा लुकाइछिपाई राखेको भन्ने बिशेष सुराकीको आधारमा ईलाका प्रहरी कार्यालय पालुङ मकवानपुरसँग समन्वय गरी खोजतलास गर्दा दुई वटा मोटरसाइकल सहित एक जनालाई पक्राउ गरिएको बताए । महानगरी प्रहरी वृत्त थानकोटका प्रहरी प्रमुख प्रहरी नयाब उपरीक्षक कुमार विक्रम थापाले पछिल्लो समय चन्द्रागिरीमा मोटरसाइकल चोरीको घटना बढि रहेको भने सूचना प्राप्त गरेसँगै सिभिल प्रहरी खटाईएको बताए । बृत्त प्रमुख थापाका अनुसार चोरीमा संलग्न अन्य व्यक्तिहरुको खोजी कार्य जारी रहेको बताए । चन्द्रागिरीबाटै एक दर्जनभन्दा बढि मोटरसाइकल चोरीको घटनाको निवेदन प्रहरी समक्ष दर्ता भएका छन् ।