काठमाडौं : प्रवेशिका परीक्षा (एसईई)मा प्राप्त नतिजाप्रति असन्तुष्ट परीक्षार्थीका लागि खुसीको खबर छ । परीक्षा नियन्त्रण कार्यालयले यस पटकदेखि परीक्षार्थीका उत्तरपुस्तिका पुनःपरीक्षण गर्ने व्यवस्था सुरु गर्दै छ । त्यसका लागि एसईई परीक्षाको नतिजाप्रति असन्तुष्टि जनाउँदै आवेदन भने दिनुपर्ने छ ।
गोरखापत्र दैनिकका अनुसार यसभन्दा पहिले निवेदन दिनेहरूले उत्तरपुस्तिका जाँचपछि प्राप्त अङ्क मात्र पुनः जोड्ने व्यवस्था थियो । अब निवेदन आए उत्तरपुस्तिका नै पुन जाँच गरिने व्यवस्था गरिएकाे हाे ।
परीक्षकहरूले जथाभावी रूपमा उत्तरपुस्तिका परीक्षण गरिदिने र त्यसबाट परीक्षार्थी अन्यायमा पर्ने गरेको तथ्य सार्वजनिक भएसँगै यस्ताे व्यवस्था गरिने भएकाे हाे । जथाभावी उत्तरपुस्तिका जाँच गर्दा धेरै विद्यार्थी मर्का परेकाे पाइएकाे थियाे । परीक्षा नियन्त्रण कार्यालयकै अध्ययनले पनि याे कुरालाई प्रमाणित गरिसकेको छ ।
त्यसैले अभिभावक, विद्यार्थी तथा विद्यालयका पदाधिकारीले निकै अघिदेखि प्रवेशिका परीक्षाको उत्तरपुस्तिका पुनःपरीक्षण गर्ने व्यवस्थाका लागि माग गर्दै आएका थिए । यसरी गरिएकाे नयाँ व्यवस्थाले विद्यार्थी वर्गमा पर्न गएकाे अन्याय न्युन हुने अनुमान गरिएकाे छ । यसै वर्ष पनि एसईईकाे नतिजापछि असन्तुष्टि देखाउँदै धेरैजना विद्यार्थीले अकालमै आफ्नाे ज्यान हालेका थिए ।
